Jákvæð raunávöxtun á krefjandi rekstrarári

Eignir jukust um 112 milljarða króna á árinu og var heildareign sjóðsins 1.405 milljarðar í árslok. Raunávöxtun síðustu 5 ára er 4,0% að meðaltali og 10 ára meðaltal raunávöxtunar er 4,4%.

Virkum sjóðfélögum fjölgaði um ríflega 700 frá fyrra ári og var meðalfjöldi þeirra 31.388. Lífeyrisþegum fjölgaði einnig og var meðalfjöldi þeirra 24.632 á síðasta ári samanborið við 23.527 árið á undan. Lífeyrisgreiðslur árið 2023 voru rúmlega 93 milljarðar kr.

Þetta er meðal niðurstaðna ársreikninga LSR fyrir árið 2023, en stjórn sjóðsins undirritaði þá á fundi sínum þann 19. apríl. Þar kemur jafnframt fram að hrein raunávöxtun A-deildar LSR var 0,9%, B-deildar 1,5% og hjá Séreign var hrein raunávöxtun Leiðar I 2,7%, Leiðar II 0,1%, 0,7% hjá Leið III og 3,9% í Tilgreindri séreign, sem var stofnuð 1. júlí 2023. Tryggingafræðileg staða A-deildar hækkar úr -5,8% í -1,5% milli ára sem skýrist af breytingum á áunnum réttindum sem framkvæmdar voru á miðu ári.

Markaðir voru sveiflukenndir á árinu 2023. Ávöxtunarkrafa á skuldabréfamarkaði fór hækkandi vegna þrálátrar verðbólgu. Hækkandi fjármögnunarkjör juku sveiflur og óvissu á innlendum hlutabréfamarkaði sem lækkaði mikið framan af ári. Undir lok árs vænkuðust hins vegar verðbólguhorfur og jákvæðar fréttir bárust af stórum hlutafélögum í kauphöllinni sem leiddi til hækkana. Þótt það hafi ekki dugað til að ársávöxtun á innlendum hlutabréfamarkaði yrði réttu megin við núllið skiluðu erlend hlutabréf hins vegar góðri ávöxtun og heildarniðurstaðan varð því 9,2% nafnávöxtun.